Polşa iyulun 1-dən etibarən ukraynalı qaçqınlara müavinət ödəməyi dayandırmaq niyyətindədir.

Bu barədə “Rzeczpospolita” qəzeti Polşa daxili işlər nazirinin müavini Pavel Şefernakerə istinadla məlumat yayıb.

“İyulun 1-dən hökumət Ukraynadan olan qaçqınlara müavinət ödəməyəcək. Ukraynalı qaçqınların çoxu adaptasiya oluna və pul qazana bilər”, - deyə nazir bildirib. 

Onun sözlərinə görə, fevralın 24-dən sonra Ukraynadan Polşaya gələn hamilə qadınlara və çoxuşaqlı analara, həmçinin əlillərə gündə 40 zlotı (təxminən 9,5 ABŞ dolları) həcmində müavinətlərin ödənilməsi davam edəcək.

Bundan öncə Polşanın ikinci ən böyük şəhəri olan Krakovun hakimiyyət orqanları iyunun 1-dən ukraynalı qaçqınların ictimai nəqliyyatdan pulsuz istifadəsini ləğv edib.

Rəsmi məlumata görə, müharibə başlayandan indiyədək Polşaya 3,57 milyondan çox ukraynalı qaçqın gəlib ki, onların da 2 milyonu bu ölkədə qalmaq istəyir.