Tbilisidə keçirilən “Evə, Avropaya” şüarlı mitinqin iştirakçılarının bir qismi hakim “Gürcü Arzusu” Partiyasının mərkəzi qərargahına doğru yürüş edib.
Ofisin yaxınlığına çatan aksiyaçılar “Get, get!” şüarı səsləndirirlər.
Əraziyə çox sayda polis əməkdaşları səfərbər olunub.
Mitinq iştirakçılarının bir hissəsi isə gecəni parlamentin binası önündə keçirməyi planlaşdırıblar. Onlar səhər saatlarında hökumət administrasiyasının binası qarşısında aksiya keçirəcəklərini bildiriblər.
**22:24
Tbilisidə keçirilən mitinqin təşkilatçıları yeni ultimatumla çıxış ediblər.
Belə ki, Gürcüstanın Baş naziri İrakli Qaribaşvilinin bu gecə saat 24:00-dək istefa verməsi tələb olunub.
Müddətin başa çatmasından sonra xalq hərəkatı konkret fəaliyyət planını açıqlayacaq.
Təşkilatçılardan biri olan Laşa Buğadze çıxış edərək bildirib ki, aksiyalar Gürcüstan Avropa İttifaqına üzvlüyə namizəd statusu alana qədər davam etdiriləcək.
**20:56
Tbilisidə Gürcüstan parlamentinin binası qarşısında “Evə, Avropaya” şüarı altında növbəti kütləvi mitinq keçirilir.
Qeyd edək ki, bu gün saat 20:00-da aksiya təşkilatçılarının iyunun 24-də Baş nazir İrakli Qaribaşvilinin istefası və milli razılıq hökumətinin yaradılması ilə bağlı irəli sürdüyü ultimatumun vaxtı başa çatıb.
Aksiya səbəbindən mərkəzi Rustaveli prospekti avtomobillərin hərəkəti üçün bağlanıb. Ərazidə və ətrafda yerləşən dövlət qurumlarının ətrafında təhlükəsizlik tədbirləri gücləndirilib.
Mitinqə Gürcüstanın müxtəlif regionlarından iştirakçılar və bir sıra ali məktəblərin tələbələri də qatılıb. Aksiyanı aparıcı müxalifət partiyalarının nümayəndələri də dəstəkləyir.
Təşkilatçılar bu gecə aksiyaçıların Rustaveli prospektində qalacağını bildiriblər.
“Report” xatırladır ki, Tbilisidə “Evə, Avropaya” şüarlı kütləvi aksiyalar Gürcüstanın Avropa İttifaqına üzvlüyə namizəd statusu almamasından sonra keçirilməyə başlanılıb. Təşkilatçılar hesab edirlər ki, statusun verilməsi üçün Avropa Komissiyasının təqdim etdiyi 12 şərtin yerinə yetirilməsini milli razılıq hökuməti təmin edə bilər.
