Özbəkistanın Qaraqalpaqıstan ərazisində kütləvi iğtişaşlar zamanı 18 nəfər ölüb.
TASS xəbər verir ki, bu barədə ölkənin Baş prokurorluğu məlumat yayıb.
Bildirilib ki, aksiyalar nəticəsində, həmçinin 243 nəfər yaralanıb.
Qeyd edək ki, iyulun 1-dən etibarən Qaraqalpaqda kütləvi etirazlar keçirilir. Buna səbəb kimi Konstitusiyaya əlavə və dəyişikliklərin yanlış şərh edilməsi göstərilir.
**10:21
Özbəkistanda məlum kütləvi etirazlar zamanı faciə yaşanıb.
Özbəkistan müxalifətinin yaydığı məlumata görə, azı 5 nəfər ölüb, yüzlərlə insan yaralanıb.
Qeyd edək ki, bir neçə gün öncə Özbəkistanın Daxili İşlər Nazirliyi ölkə Konstitusiyasına dəyişikliklərlə əlaqədar Nukusda qanunsuz nümayişin keçirildiyi barədə məlumat yayıb. Məlumata görə, ictimai qaydanın pozulması halları və vətəndaşlar tərəfindən müxtəlif hüquqpozmaların törədilməsinin qarşısının alınması məqsədilə əraziyə hüquq-mühafizə orqanlarının qüvvə və vasitələri cəlb edilib.
Hüquq-mühafizə orqanları iğtişaş təşkilatçılarından bir qrupunu saxlayıblar. Qanunsuz nümayişin ölkədə aparılan konstitusiya islahatlarının yanlış şərh edilməsi nəticəsində baş verdiyi qeyd olunur.
Prezident Şavkat Mirziyoyev konstitusiyanın Qaraqalpaq Muxtar Respublikası ilə bağlı maddələrinə dəyişiklik etməmək barədə qərar verib.
Bundan başqa, Prezident Qaraqalpaq Muxtar Respublikasında iyulun 3-dən avqustun 2-dək fövqəladə vəziyyət elan edib.(azvision.az)
