Sumqayıt şəhərində istirahət mərkəzində baş verən partlayışla əlaqədar araşdırmalara başlanılıb.
Senzor.az bildirir ki, Baş Prokurorluğun Mətbuat Xidmətindən verilən məlumatda belə deyilir.
Qeyd olunub ki, hadisə Sumqayıt şəhərinin Sahil küçəsində, Corat-Novxanı yolunda “Sunset” istirahət mərkəzinin qazanxanasında baş verib. Nəticədə üç nəfər xəsarət alıb.
Hazırda Sumqayıt Şəhər Prokurorluğunda araşdırma aparılır.
Bu arada Sumqayıt Tibb Mərkəzi “Sunset” istirahət mərkəzində baş verən partlayışda xəsarət alanlarla bağlı məlumat yayıb.
Bildirilib ki, bu gün saat 19:12 radələrində Sumqayıtın Sahil küçəsində partlayış olması barədə Sumqayıt Tibb Mərkəzinin Təcili Tibbi Yardım Stansiyasına çağırış olub.
Çağırışla əlqədar hadisə yerinə 2 briqada cəlb edilib. Məlum olub ki, Corat-Novxanı yolunda, Sahil küçəsində fəaliyyət göstərən “Sunset” istirahət mərkəzində suqızdırıcının (kombi) partlaması nəticəsində orada çalışan 3 əməkdaş müxtəlif dərəcəli yanıq xəsarətləri alıb. Xəsarət alanlardan ikisi qadın (1962 və 1969-cu il təvəllüdlü), biri isə 1963-cü il təvəllüdlü kişidir.
**20:24
Fövqəladə Hallar Nazirliyinin (FHN) “112” qaynar telefon xəttinə Abşeron rayonu, Novxanı kəndinin ərazisində yerləşən “Sunset” istirahət mərkəzində partlayış baş verməsi barədə məlumat daxil olub.
Senzor.az Nazirliyə istinadla xəbər verir ki, məlumatla əlaqədar dərhal FHN-in müvafiq qüvvələri hadisə yerinə cəlb olunub.
Müəyyən olunub ki, ilkin məlumata əsasən, istirahət mərkəzinin suqızdırıcı (kombi) sistemində ani partlayış hadisəsi baş verib və nəticədə 3 nəfər xəsarət alıb. Dağıntı və yanğın hadisəsi qeydə alınmayıb.
FHN-in qüvvələri tərəfindən obyekt ərazisində müvafiq təhlükəsizlik tədbirləri görülüb.
