Bakının Nəsimi rayonunda, Mircəlal Paşayev küçəsində yanğın hadisəsi qeydə alınıb.
Senzor.az bildirir ki, bu barədə Fövqəladə Hallar Nazirliyi (FHN) məlumat yayıb.
Məlumata görə, “Millenium” şadlıq sarayında toy mərasimi keçirilən zaman mətbəxin tüstü bacası alovlanmağa başlayıb. Dərhal əraziyə FHN-in Dövlət Yanğından Mühafizə Xidmətinin dörd texnikası və canlı briqadası gəlib.
Şadlıq sarayında toy mərasiminin iştirakçıları çölə çıxarılıb. Alovun binanın damına keçməsinin qarşısı alınıb.
Yanğın söndürülüb. Şadlıq sarayına elektrik enerjisinin verilişi dayandırılıb.
Hazırda araşdırma aparılır.
