Xırdalanda yaşayış binasında partlayış zamanı 3 nəfər xəsarət alıb.
Senzor.az bildirir ki, FHN-in yaydığı yeni məlumatda belə deyilir.
Məlumata görə, hadisə yerində əməliyyat şəraitinin ilkin qiymətləndirilməsi zamanı AAAF Park Yaşayış Kompleksində ondördmərtəbəli yaşayış binasının 2-ci mərtəbəsindəki mənzildə ilkin ehtimala görə məişət qazının sızması nəticəsində yanğınla nəticələnməyən partlayışın baş verdiyi müəyyən olunub.
Hadisə şahidlərinin sözlərinə görə partlayış zamanı 4 nəfər-ana və 3 uşağı xəsarət alıb. Onların Nərimanov Tibb Mərkəzinin Yanıq şöbəsinə yerləşdirildikləri bildirilir. Partlayış dalğasının zərbəsindən həyətdə park edilmiş 2 avtomobilə ziyan dəyib.
FHN əməkdaşları tərəfindən ərazidə müvafiq təhlükəsizlik tədbirləri görülüb.
**21:34
Fövqəladə Hallar Nazirliyinin (FHN) "112" qaynar telefon xəttinə Abşeron rayonu, Xırdalan şəhəri, AAAF Park Yaşayış Kompleksində çoxmərtəbəli yaşayış binasındakı mənzildə partlayış olması barədə məlumat daxil olub.
Senzor.az bildirir ki, bu barədə FHN-dən məlumat verilib
Məlumatla əlaqədar FHN-in Dövlət Yanğından Mühafizə Xidmətinin yanğından mühafizə bölmələri və Xüsusi Riskli Xilasetmə Xidmətinin müvafiq xilasetmə qüvvələri çağırış üzrə cəlb olunub.
İlkin məlumata əsasən, yanğın hadisəsi yoxdur.
“Qafqazinfo”nun əldə etdiyi məlumata görə, partlayışa səbəb qaz sızması olub.
Hadisə nəticəsində 4 nəfər yaralanıb. Onlar xəstəxanaya aparılıblar.
Partlayışın təsirindən divar həyətə aşıb. Nəticədə parklanma vəziyyətində olan maşınlara ciddi ziyan dəyib.
Hazırda faktla bağlı araşdırma aparılır.
