Yerusəlimdə avtomobil bir neçə nəfərin olduğu avtobus dayanacağına çırpılıb.
Senzor.az yerli KİV-ə istinadən bildirir ki, hadisə nəticəsində 6 yaşlı uşaq və 20 yaşlı gənc həlak olub, daha 6 nəfər yaralanıb. Yaralananlardan ikisi həlak olan 6 yaşlı uşağın 8 və 10 yaşlı qardaşları, biri isə 42 yaşlı atasıdır.
İsrail hakimiyyəti hadisəni terror hücumu kimi qiymətləndirib, sürücü polis əməkdaşları tərəfindən zərərsizləşdirilib.
Hadisəni törədən şəxsin İsaviyə bölgəsinin 31 yaşlı sakini Hossein Karakadır olduğu bildirilir.
“Terrorçu yerindəcə zərərsizləşdirilib və məhv edilib. Yenə də biz günahsız insanların yaralanmasına səbəb olan ciddi insidentlə, cümə günü günortadan sonra avtobus dayanacağında gözləyən mülki şəxslərə qarşı vəhşicəsinə hücumla üzləşirik”, - İsrailin fövqəladə hallar xidmətinin rəsmisi bildirib.
