Naxçıvanda yaşayış binasında baş verən yanğın nəticəsində beşmərtəbəli binanın dam örtüyü 400m² sahədə yanıb.
Bu barədə Senzor.az-a Fövqəladə Hallar Nazirliyindən bildirilib.
Məlumatda qeyd olunub ki, “112” qaynar telefon xəttinə Naxçıvan şəhəri, 2-ci mikrorayonda yerləşən çoxmənzilli yaşayış binasında yanğın baş verməsi barədə məlumat daxil olub və yanğın dərhal əraziyə cəlb olunmuş yanğından mühafizə bölmələri tərəfindən qısa müddətdə söndürülüb.
Yanğın nəticəsində beşmərtəbəli yaşayış binasının dam örtüyü 400m² sahədə yanıb. Yanğınsöndürənlərin çevik müdaxiləsi sayəsində yanğının genişlənməsinə, o cümlədən mənzillərə keçməsinə imkan verilməyib.
Yanğın zamanı yanğınsöndürənlər tərəfindən bina sakinlərinin təxliyəsi həyata keçirilib, xəsarət alan olmayıb.
Hadisə ilə əlaqədar aidiyyəti qurumlar tərəfindən araşdırma aparılır.
**17:09
Naxçıvanda yaşayış binasında baş verən yanğın söndürülüb.
Xəbərə görə, hazırda binada soyutma işləri aparılır.
İlkin ehtimala görə, yanğın elektrik xətlərində olan qısaqapanma nəticəsində baş verib.
**16:26
Naxçıvan şəhərində yaşayış binası yanır.
Xəbərə görə, hadisə şəhərin 2-ci mikrorayonunda yerləşən binada qeydə alınıb.
Yanğının binanın damında başladığı bildirilir.
Hazırda yanğının söndürülməsi üçün tədbirlər görülür.
