Cəlilabadda magistral yolda hərəkət bərpa edilib.
Senzor.az bildirir ki, bu barədə DİN-in Mətbuat Xidmətinin Lənkəran regional qrupunun baş inspektoru, polis kapitanı Məhəmməd Rzayev məlumat verib.
Onun sözlərinə görə, köhnə Ələt-Astara avtomobil yolunun Göytəpə şəhərindən keçən hissəsində hərəkətin təhlükəsizliyi polis əməkdaşları və aidiyyəti qurumlar tərəfindən təmin olunub. Hər iki istiqamətdə nəqliyyatın hərəkəti bərpa olunub.
Qeyd edək ki, Cəlilabad rayonunda güclü külək ağacları magistral yola aşırdığından hərəkət məhdudlaşdırılmışdı.
**21:12
Cəlilabadda güclü küləyin fəsadları aradan qaldırılır.
"Report"un məlumatına görə, rayon ərazisində baş verən qəfil külək nəticəsində elektrik xətləri qırılıb, rayon mərkəzi də daxil olmaqla, bir neçə kənd işıqsız qalıb.
Həmçinin güclü külək onlarla ağacı sındırıb. Külək köhnə Ələt-Astara avtomobil yolunun Göytəpə şəhərindən keçən hissəsində ağacları yola aşırıb. Eyni zamanda şəhər ərazisində fərdi evlərin və obyektlərin dam örtüyü dağılıb, işıqlar kəsilib.
Leysan yağışı Rayon Mərkəzi Xəstəxanasına da ziyan vurub. Yağış suları xəstəxananın infeksion korpusuna dolub.
Hazırda rayon fövqəladə hallar komissiyası və digər dövlət orqanları təbii fəlakətin aradan qaldırılması istiqamətində işlər aparırlar. Cəlilabad şəhərinin bir hissəsində elektrik enerjisinin verilişi bərpa olunub. İlkin məlumata görə, insan tələfatı yoxdur.
Əlavə məlumat veriləcək.
** 20:08
Cəlilabadda güclü külək fəsadlar törədib, bəzi əraziləri işıqsız qoyub.
"Report"un məlumatına görə, yağan leysan və güclü külək rayon mərkəzində və bir neçə kənddə elektrik enerjisinin kəsilməsinə səbəb olub.
Şəhərin mərkəzində ağaclar aşıb.
Hazırda rayon ərazisində küləyin törətdiyi problemlər aradan qaldırılır.
