Rusiyanın Dağıstan Respublikasının paytaxtı Mahaçqala şəhərində yanacaqdoldurma məntəqəsində baş vermiş partlayış nəticəsində ölənlərin sayı 35-ə çatıb.
Bu barədə yerli tibb işçiləri bildirib.
**11:00
Rusiyanın Dağıstan Respublikasının paytaxtı Mahaçqala şəhərinin Kumtorkalinski rayonunda fövqəladə vəziyyət rejimi tətbiq edilib.
TASS bildirir ki, bu barədə regionun rəhbəri Sergey Melikov məlumat verib.
O, yanacaqdoldurma məntəqəsində baş vermiş faciənin nəticələrinin aradan qaldırılması üzrə operativ qərargahın iclasını keçirib.
**09:28
Mahaçqalada yanacaqdoldurma məntəqəsində baş verən partlayış nəticəsində ölənlərin xatirəsini yad etmək məqsədi ilə Dağıstan Respublikası ərazisində 3 günlük matəm elan edilib.
Məlumatı Rusiya KİV-i yayıb.
Xatırladaq ki, avqustun 14-də Rusiyanın Dağıstan Respublikasının paytaxtı Mahaçqalada yanacaqdoldurma məntəqəsində partlayış və yanğın olub. Hadisə nəticəsində ölənlərin sayı 27-yə çatıb, 102 nəfər hospitala yerləşdirilib.
Rusiya Federasiyası Cinayət Məcəlləsinin 238-ci maddəsinin 3-cü hissəsi (İstehlakçıların həyat və ya sağlamlığının təhlükəsizliyi tələblərinə cavab verməyən xidmətlərin göstərilməsi, iki nəfər və ya daha çox şəxsin ehtiyatsızlıqdan ölümünə səbəb olduqda) ilə cinayət işi başlanılıb.
**01:36
Rusiyanın Dağıstan Respublikasının paytaxtı Mahaçqala şəhərində yanacaqdoldurma məntəqəsində güclü partlayış və yanğın baş verib.
Senzor.az Dağıstan Səhiyyə Nazirliyinin mətbuat xidmətinə istinadən bildirir ki, partlayış nəticəsində ikisi azyaşlı olmaqla 12 nəfər ölüb, daha 50 nəfərə yaxın isə yaralanıb.
Yanğının artıq yaxınlıqdakı evlərə keçdiyi, daha bir partlayış təhlükəsinin olduğu bildirilir.
Hadisə yerində yanğınsöndürənlər və həkim briqadaları işləyir.
