Lənkəran rayonunda 36 yaşlı kişi dəm qazından boğularaq ölüb.“Report”un verdiyi xəbərə görə, hadisə Göyşaban kəndində qeydə alınıb.
Belə ki, 1986-cı il təvəllüdlü Xəyal Ağacəfər oğlu Qasımov fevralın 27-də Bakıdan ailəsi ilə birlikdə Lənkərana gəlib. Həyat yoldaşı və iki azyaşlı övladını qayınatasıgildə qoyaraq ata evlərinə gedib. Ertəsi gün mərhumun qaynı yeznəsinin gəlmədiyini görərək, onun ata evinə gəlib.
Qapının bağlı olduğunu görüb və geri qayıdıb. Daha sonra ailə üzvləri təkrar gəlib və pəncərədən evə daxil olanda onu huşsuz halda aşkarlayıblar. Hadisə yerinə hüquq-mühafizə orqanlarının əməkdaşları baxış keçirib. X.Qasımovun bir müddət əvvəl keçindiyi məlum olub. Onun dəm qazından öldüyü ehtimal edilir.
Faktla bağlı Lənkəran Rayon Prokurorluğunda araşdırma aparılır.
