Cəlilabadda ağır yol qəzası baş verib.“Report” bildirir ki, hadisə Cəlilabad-Yardımlı yolunun Sərhədabad kənd ərazisindən keçən hissəsində qeydə alınıb: "VAZ-2107" və "Mitsubishi" markalı avtomobillər toqquşub.
Qəza nəticəsində "VAZ-2107" markalı avtomobilin sürücüsü, 1966-cı il təvəllüdlü Məlikov Saleh İshaq oğlu, sərnişinlər-1978-ci il təvəllüdü Kərimov Elçin Xanverdi oğlu, 1970-ci il təvəllüdlü İmanova Şura Həsənağa qızı, 1995-ci il təvəllüdlü Şahbazova Gültəkin Həmzə qızı və 1975-ci il təvəllüdlü Kərimova Gülnarə Sulduz qızı hadisə yerində ölüblər. Onların hamısı Cəlilabad rayonunun Şabanlı kənd sakinləridir.
"Mitsubishi" markalı avtomobildə olan üç nəfər isə müxtəlif dərəcəli bədən xəsarətləri alıblar. Onlar Cəlilabad rayonunun İnili kənd sakinləri - 1948-ci il təvəllüdlü Rəhimov Xudaş Musa oğlu, 1984-cü il təvəllüdlü Rəhimov Samir Xudaş oğlu və 2006-cı il təvəllüdlü Rəhimova Jalə Samir qızıdır. Yaralılar Cəlilabad Rayon Mərkəzi Xəstəxanasına yerləşdiriliblər.
Hadisə ilə bağlı araşdırma aparılır.
