Azərbaycanın sabiq xarici işlər naziri, ölkəmizin Polşada və Macarıstandakı keçmiş fövqəladə və səlahiyyətli səfiri, filologiya elmləri doktoru Vilayət Quliyev bu gün “Facebook” sosial şəbəkəsində növbəti maraqlı status paylaşıb. O bu dəfə ağır və uzun sürən xəstəlikdən sonra dünən dünyasını dəyişmiş Rusiya Liberal Demokrat Partiyasının lideri, Rusiya Dövlət Dumasında eyniadlı fraksiyanın rəhbəri Vladimir Jirinovski ilə bağlı ilginc bir xatirəsini yada salıb. Senzor.az dəyərli ziyalımızın həmin statusunu təqdim edir.
**
Jirinovskini canlı formatda və öz ampluasında ilk dəfə 1997-ci ilin mart ayında Sofiyada görmüşdüm. Milli Məclisdəki deputat həmkarım Ziyafət Əsgərovla birlikdə NATO-nun bu ölkədə keçirdiyi Rouz-Rout seminarında iştirak edirdik.
Görünür, Moskvadan eyni təyyarə ilə gəlmişdik. Amma biznes-klass sərnişini Jiriki bizdən əvvəl qarşılayıb salona gəirmişdilər və artıq burada bağıra-bağıra NATO tədbirinə ev sahibliyi edən Bolqarıstanı tarixi müttəfiqi, xilaskarı Rusiyaya xəyanətdə, NATO üzvü Türkiyənin “altına yıxılmaqda” (“подлаживание под Турцией”) ittiham edirdi.
Sonra salonu gərdiş eləməyə başladı və yaxamızdakı “Azərbaycan” yazısını görüb önümüzdə dayandı, “Почему гордый Азербайджан стоит на стороне?”- deyə söz atdı. “Последний бросок на Юг» kitabında ölkəmiz haqda yazdıqlarınızdan sonra sizinlə arada məsafə saxlamaq yaxşıdır”-dedim. Ziyafət də sözlərimə qüvvət verdi. Jirik:-Uşaqlar, xırdaçı olmayın, - dedi. – Onda elə fikirləşirdim, o cür də yazmışdım. İndi tamamilə fərqli düşüncədəyəm. Yadınızda saxlayın ki, yalnız ölülər və dəlilər fikirərini dəyişmirlər. Və kiçik nitqinə multik qəhrəmanı Kot Leopoldun məşhur sözləri ilə xitam verdi: “Ребята, давайте жить дружно!”
Amma özü Azərbaycana münasibətdə zaman-zaman nifaq və düşmənçilik toxumu səpdi. Dəli kimi fikrini şəraitə, ağalarının istəyinə uyğun şəkildə tez-tez dəyişdi. Ölü kimi isə təbii ki, daha intizamlı və sabitqədəm olar...
