Bakıda marşrut avtobusunun iştirakı ilə daha bir yol qəzası olub.
Senzor.az bildirir ki, bu barədə Bakı Nəqliyyat Agentliyindən (BNA) məlumat verilib.
Qeyd olunub ki, bu gün səhər saatlarında Mehdiabad qəsəbəsində “Çinar Trans” MMC-nin istismarında olan 81 nömrəli müntəzəm marşrut xətti üzrə hərəkət edən 99 JZ 281 nömrə nişanlı avtobus minik avtomobili ilə toqquşub. Qəza avtobus dönmə əməliyyatını yerinə yetirərkən baş verib.
Avtobus depodan reysə çıxmaq üçün Qaraçuxur qəsəbəsinə gedən zaman baş verdiyindən nəqliyyat vasitəsi boş olub. Minik avtomobilində olan iki nəfər isə xəsarət alıb.
Hadisə ilə əlaqədar müvafiq araşdırma aparılır.
Xatırladaq ki, dünən paytaxtın Nizami rayonunda “Çinar Trans” MMC-yə məxsus daha bir marşrut avtobusu qəzaya düşmüş və 5 nəfər xəsarət almışdı.
