Paytaxtda yaşayış binasında yanğın olub, 15 nəfər təxliyə edilib.

Bu barədə Senzor.az-a Fövqəladə Hallar Nazirliyindən məlumat verilib.

Bildirilib ki, nazirliyin “112” qaynar telefon xəttinə Bakı şəhərinin Binəqədi rayonu, Mir Cəlal küçəsi 145 ünvanında yanğın baş verməsi barədə məlumat daxil olub.

Məlumatla əlaqədar dərhal FHN-in Dövlət Yanğından Mühafizə Xidmətinin və Bakı Regional Mərkəzinin qüvvələri əraziyə cəlb olunub.

Yanğınsöndürənlərin operativ müdaxiləsi sayəsində doqquzmərtəbəli yaşayış binasının 8-ci mərtəbəsində yerləşən mənzilin mətbəxində baş vermiş yanğın genişlənməsinə imkan verilmədən qısa müddətdə söndürülüb.

Yanğın zamanı FHN-in qüvvələri tərəfindən tüstülənmiş mənzillərdən 15 nəfər bina sakini təxliyə olunub.

DİN-in Mətbuat Xidmətindən isə bildirilib ki, yanğın baş verən yaşayış binası polis əməkdaşları tərəfindən mühafizəyə götürülüb: “O da qeyd olunub ki, sakinlərin əmlakı mühafizə altındadır, əraziyə nəzarət artırılıb və müvafiq tədbirlər davam etdirilir”.